﻿Zabur 10
PINTADUWA MINDAMO DO KOTIMBANGO

(Pemimpin)
O TUHAN, nokuro tu yaddino o kosodu Nu, om sumusut Ko hiza di sid kosusa'an okoi?

(Jemaat)
I kasavato di ginavo dit ulun tara'at mangaladtak dit ulun mosikim. Yoti dino kosulung di burunsut dioti kondiri.

(Pemimpin)
It ulun tara'at ounsopot dit poniat dioti dot ara'at, om it ulun di mookisusuhul mongolupu om mangamu-amu di TUHAN.

(Jemaat)
It ulun tara'at amu mangagandang di Kinoringan, tu yoti asavat i ginavo om indoson dioti ong aso Kinoringan.

(Pemimpin)
It tulun tara'at kamanang nopo sid sokoviai i gagama'on dioti. Amu ohorotizan dioti i pongohukuman di Kinoringan. Irak-irakan ogi dioti it ongosangod dioti.

(Jemaat)
Momoros yoti sid saralom di ginavo dot, “Yokoi diti amu aratu, amu okoi asandatan do kosusa'an,” ka.

(Pemimpin)
It ongoboros dioti noponu do sumpa, vudut om indoronok. Yoti alangkas mongusiba om mangara'at dot ulun.

(Jemaat)
Sumusut yoti sid ongokampung, om magavang tu mamatai dit ulun dit aso sala. Mongimpa yoti dit ulun dot amu kovogui,

(Pemimpin)
monginud yoti sid sususuton yadko mondou. Monginud yoti dit ulun tokugui, iri ogi tabpa'an om gazaton antad sino.

(Jemaat)
It ulun dit amu kovogui mikumparan no do nongorodos, notori di korongito.

(Pemimpin)
Ka dit etung dit ulun tara'at, “Posimozo i Kinoringan! Kiumodom i Kinoringan om amu mimot dahai!” ka.

(Jemaat)
O TUHAN, hukumai no it ulun tara'at! Kada poolingai it ulun nasansara!

(Pemimpin)
Nokuro ma it ulun tara'at tu mongusiba do Kinoringan, om mongitung yoti dot amu hukumon di Kinoringan?

(Jemaat)
Topot o Tuhan, Ikau dino tantu kemot. Mongontupat Ko di kosusa'an om kapagasan dit ulun, om soumul osodia monulung dioti. It ulun dot amu kovogui patahak sid Dikau di kondiri dau, tu Ikau dino soumul monulung dit ulun tosusa.

(Pemimpin)
Tipuo no i longon dit ulun di momudut om ara'at, hukumo no yoti sabap i korongito dioti do sampai engkod yoti mangagama dino.

(Jemaat)
I TUHAN o raja do penlaid, om it ulun dit amu kotutun di TUHAN atanus antad sid pomogunan di TUHAN.

(Pemimpin)
O TUHAN, tumbozo'o no it indomo'on dit ulun dot ousiba, tahakai no yoti do kakansangan.

(Semua)
Mongining Ko dit ihad dit usan-usan om it ulun di naladtakan. Mangapad Ko dioti supaya amu no indorosizon vagu dot ulun yoti.

